Qarabağ və Şərqi Zəngəzur iqtisadi rayonlarında bərpa olunan enerji resurslarının tətbiqi ilə regionda kiçik və orta biznes subyektlərinin inkişafına, məşğulluq səviyyəsinin yüksəldilməsinə və regionun enerji təhlükəsizliyinin gücləndirilməsinə dəyərli töhfə veriləcək.
Bunu SOCAR prezidenti Rövşən Nəcəf “Enerji və Dördüncü Sənaye İnqilabı” hakaton müsabiqəsinin qaliblərinin mükafatlandırılma mərasimi zamanı bildirib.
R. Nəcəf müsabiqənin qaliblərini təbrik edərək hakatonun mövzusunun ölkəmizin strateji hədəfləri istiqamətində müəyyənləşdirildiyini, bu xüsusda Azərbaycanda yeni və innovativ ideyaların formalaşmasına, bərpa olunan enerji mənbələrinin inkişafına, yüksəkixtisaslı kadr potensialının gücləndirilməsinə dəstək olmaq məqsədi daşıdığını bildirib. Qarabağın “yaşıl enerji” zonasına çevrilməsinin dövlət başçısının müəyyənləşdirdiyi müasir inkişaf strategiyasının əsas tərkib hissəsi olduğunu vurğulayan SOCAR prezidenti, SOCAR-ın enerji keçidi, rəqəmsallaşma və innovasiya kimi strateji təşəbbüslərindən bəhs edən R. Nəcəf, alternativ enerji mənbələri, data analitika, süni zəka əsaslı qərarvermə, əşyaların interneti kimi sahələrdə gənclərin uğurlu çıxışından məmnunluğunu ifadə edib.
Mükafatlandırma mərasimində çıxış edən BANM-in rektoru Elmar Qasımov hakatonun istedadlı gənclərin bilik və bacarıqlarının inkişaf etdirilməsi, innovativ ideyalarının təqdim olunması baxımından xüsusi əhəmiyyət kəsb etdiyini vurğulayıb. Yarışda innovativ düşüncələrə sahib gənclərin maraqlı layihələr təqdim etdiklərini diqqətə çatdıran E. Qasımov müsabiqənin həm yeni dostluqların yaranması, həm də bilik mübadiləsi üçün əlverişli mühit yaratdığını bildirib.
Dördüncü Sənaye İnqilabının Təhlili və Koordinasiya Mərkəzinin (4SİM) icraçı direktoru Tamerlan Tağıyev gənclərin layihəyə olan böyük marağını vurğulayaraq müsabiqənin əhəmiyyəti barədə danışıb. Qlobal iqtisadiyyatda Dördüncü Sənaye İnqilabının və rəqəmsallaşmanın diktəedici və həlledici rolundan bəhs edən 4SİM-in icraçı direktoru bu prosesdə Azərbaycanın mövqeyinin gücləndirilməsinin və aparıcı ölkələr sırasında yer almasının qarşıda duran məqsədlərdən olduğunu bildirib.
T. Tağıyev innovativ ideyalara malik istedadlı gənclərə dəstək olmaq, ölkəmizdə rəqəmsal bilik və bacarıqları, həmçinin innovasiya ekosistemini inkişaf etdirmək üçün belə layihələrin gələcəkdə də keçirilməsinin planlaşdırıldığını qeyd edib.
Qeyd edək ki, “Enerji və Dördüncü Sənaye İnqilabı” hakaton müsabiqəsi Bakı Ali Neft Məktəbində (BANM) SOCAR və 4SİM birgə təşkilatçılığı ilə keçirilib.
Azərbaycanda, xüsusilə Şərqi Zəngəzur və Qarabağ iqtisadi rayonlarında “yaşıl” və rəqəmsal enerji texnologiyalarının tətbiqi, bərpa olunan enerji resurslarından istifadənin genişləndirilməsi və enerji təhlükəsizliyinin gücləndirilməsi üçün innovativ ideyalara dəstək vermək məqsədilə təşkil olunan müsabiqə “enerji və əşyaların interneti”, “enerji və süni intellekt”, “enerji və rəqəmsal iqtisadiyyat” mövzularını əhatə edib.
Tədbirin əvvəlində Ermənistan silahlı qüvvələrinin genişmiqyaslı təxribatlarının qarşısını alarkən şəhid olan qəhrəmanlarımızın əziz xatirəsi bir dəqiqəlik sükutla yad edilib.
Daha sonra “Enerji və Dördüncü Sənaye İnqilabı” hakatonu ilə bağlı video təqdimat nümayiş olunub.
Çıxışlardan sonra münsiflərə, mentorlara, könüllülərə və tədbirin təşkilatçılarına təşəkkürnamələr təqdim edilib. “Ən kreativ komanda” və “Ən əzmkar komanda” nominasiyaları üzrə həvəsləndirici mükafatlara “Outliers” və “DataMass” komandaları layiq görülüblər.
Daha sonra üçüncü, ikinci və birinci yerin qalibləri elan olunub. “Hydroponics” komandası birinci, “Zəngəzur” komandası ikinci, “Generation Z” komandası isə üçüncü yerin qalibi olub. Komandalara mükafatları SOCAR-ın prezidenti R. Nəcəf, 4SİM-in icraçı direktoru T. Tağıyev və BANM-in rektoru E. Qasımov təqdim ediblər.
https://report.az/energetika/rovsen-necef-berpa-olunan-enerji-resurslarinin-tetbiqi-regionun-enerji-tehlukesizliyini-guclendirecek/