Abu Dabi Milli Neft Şirkəti (ADNOC) Xəzər regionunda qazın dəyər zəncirinin yaradılmasına investisiya yatırmağı planlaşdırır.
Bunu ADNOC şirkətinin aşağı karbon həlləri və beynəlxalq inkişaf üzrə icraçı direktoru Musabbeh Al Kaabi “S&P Global Commodity Insights” nəşrinə müsahibəsində bildirib.
Onun sözlərinə görə, bunun üçün ADNOC hökumətlərarası əlaqələrindən, beynəlxalq neft şirkətləri ilə tərəfdaşlıqdan və MDB regionundan qazın Türkiyə və Avropa kimi bazarlara ixracı üçün strateji ehtiyacdan istifadə edəcək.
M. Kaabi bildirib ki, Azərbaycan Dövlət Neft Şirkəti (SOCAR) və Fransanın “TotalEnergies” şirkətləri ilə tərəfdaş olmaq üçün Xəzər regionunda “Abşeron” yatağında 30 % pay alan ADNOC regionda və qlobal miqyasda daha da genişlənmək üçün bu şirkətlərlə işləməyi səbirsizliklə gözləyir: “Bizim təbii qaza və dəyər zəncirinə sərmayə yatırmaq üçün strategiyamız mövcuddur. Əgər biz gəlirlərimizi və konsorsiumda konstruktiv iştirakımızı artırmaq üçün cəlbedici təklifi görsək, onu nəzərdən keçirəcəyik”.
O qeyd edib ki, iki ticarət bölməsi yaradan ADNOC, mayeləşdirilmiş təbii qaz (LNG) ticarətindən yüksək marjalardan faydalanmaq istəyir: “ADNOC Trading” 100 % ana şirkətə məxsusdur. “ADNOC Global Trading” şirkəti isə OMV və “Eni” ilə birgə yaradılmış müəssisədir. Səhmdarlarımız üçün düzgün dəyər yaratmaq üçün bəzən dəyər zəncirinin yalnız bir hissəsində olmaq lazım deyil. Əksinə, gələcəkdə potensial ticarət də daxil olmaqla inteqrasiya edilmiş marjaya sahib olmaq daha yaxşıdır”.
M. Kaabi vurğulayıb ki, Azərbaycanın Xəzər dənizindəki “Abşeron” qaz-kondensat yatağına ilk böyük beynəlxalq sərmayəsindən sonra ADNOC bu sərmayənin yüksək gəlirliliyinə diqqət yetirərək qlobal LNG biznesini genişləndirmək niyyətindədir: “Biz gücümüzü tamamlayan bir strategiya həyata keçiririk. Biz tarixən LNG-də əhəmiyyətli oyunçu olmuşuq və indi Əbu Dabidə genişlənirik. Biz bunu bütün dünyada mühüm mövqelərlə tamamlamaq istərdik”.
Şirkət rəsmisi deyib ki, əgər haradasa, Şərqdə və ya Qərbdə, investisiya meyarlarımıza, strateji əsaslandırmamıza və güclü tərəflərimizdən, o cümlədən ticarətdən daha çox dəyər yaratmaq qabiliyyətimizə cavab verən LNG layihəsi varsa, biz bunu nəzərə alacağ.
Xatırladaq ki, bu ilin avqustun əvvəlində SOCAR, “TotalEnergies” və ADNOC şirkətləri arasında “Abşeron” qaz-kondensat yatağında 30 %-lik iştirak payının satışına dair Saziş imzalanıb. Satınalma tamamlandıqdan sonra ADNOC şirkəti “Abşeron” yatağında 30 %, SOCAR və “TotalEnergies” şirkətlərinin hər biri isə 35 %-lik iştirak payına malik olacaq.
ADNOC-un Birləşmiş Ərəb Əmirliklərinin (BƏƏ) hüdudlarından kənarda apstrim layihəsində ilk investisiyasını Azərbaycana yatırması ölkəmizdə xarici sərmayədarlar üçün yaradılan əlverişli investisiya mühitinin növbəti təzahürüdür. Saziş Azərbaycan və BƏƏ arasında strateji əlaqələri daha da gücləndirəcək və ölkəmizin etibarlı təbii qaz təchizatçısı kimi mövqeyinə dəyərli töhfəsini verəcək.
Qeyd edək ki, Xəzər dənizinin Azərbaycan sektorunda, Bakıdan təxminən 100 kilometr cənub-şərqdə yerləşən “Abşeron” qaz-kondensat yatağı JOCAP (Joint Operating Company of Absheron Petroleum B. V.) tərəfindən idarə olunur. Yataqdan ilk qaz cari ilin iyul ayının əvvəlində hasil edilib.
https://report.az/energetika/adnoc-xezerde-qazin-deyer-zencirinin-yaradilmasina-investisiya-yatirmaga-hazirdir/