Azərbaycan hökuməti Qarabağ regionunu dinamik inkişaf edən “təmiz enerji” mərkəzinə çevirmək niyyətindədir, bunu Azərbaycan Prezidentinin Cəbrayıl, Qubadlı və Zəngilan rayonları üzrə xüsusi nümayəndəsi Vahid Hacıyev Zəngilanda “COP29-a aparan yol: Dayanıqlı və davamlı gələcək” mövzusunda 29-cu yüksək səviyyəli görüşdə çıxışı zamanı deyib.
“Cəbrayıl, Qubadlı və Zəngilanda zəngin günəş enerjisi resurslarından istifadə edərək, biz yaşayış binalarına və küçə infrastruktur sistemlərinə günəş panellərini inteqrasiya edirik. Bundan əlavə, elektrikli nəqliyyat vasitələri üçün günəş enerjisi doldurma stansiyaları, “ağıllı parkinq” və digər ekoloji cəhətdən təmiz həllər kimi təşəbbüslər davamlı təcrübələrin həyata keçirilməsinə sadiqliyimizi vurğulayır”, - o bildirib.
V.Hacıyev xatırladıb ki, Cəbrayılda Böyük Britaniyanın BP şirkəti 240 MVt gücündə günəş elektrik stansiyası tikmək niyyətindədir, “Nobel Energy” şirkəti isə 100 MVt gücündə günəş panelləri istehsalı zavodunun tikintisinə sərmayə qoymaq niyyətindədir.
Onun sözlərinə görə, bu təşəbbüslər Qarabağ regionunun dinamik inkişaf edən “təmiz enerji” mərkəzinə çevrilməsinə yönəlmiş milli strategiyaya üzvi şəkildə uyğun gəlir.
https://report.az/energetika/vahid-haciyev-qarabag-dinamik-inkisaf-eden-temiz-enerji-merkezine-cevrilecek/