Azərbaycan regional enerji təhlükəsizliyinin möhkəmləndirilməsi və dayanıqlı təchizat infrastrukturunun qurulması istiqamətində ardıcıl və uzaqgörən siyasətini davam etdirir. Bu baxımdan, İğdır-Naxçıvan qaz kəmərinin tamamlanması Prezident İlham Əliyevin rəhbərliyi ilə həyata keçirilən uğurlu enerji strategiyasının önəmli nəticələrindən biri kimi dəyərləndirilir.
2020-ci ildə Azərbaycan ilə Türkiyə arasında imzalanmış Anlaşma Memorandumuna əsasən planlaşdırılan bu layihə Azərbaycanın dövlət büdcəsi hesabına maliyyələşdirilib. Layihənin idarə olunması və istismarı SOCAR-ın törəmə müəssisəsi olan “SOCAR Midstream Gas Operations” MMC-yə (SOCAR MGO) həvalə edilib.
Ümumi uzunluğu 97,5 km olan qaz kəmərinin 80 kilometri Türkiyə ərazisində, 17,5 kilometri isə Azərbaycan Respublikasının Naxçıvan Muxtar Respublikasında yerləşir. Bu layihə Naxçıvanın sabit və dayanıqlı qazla təchiz olunmasını hədəfləyir və ilk dəfə olaraq muxtar respublika birbaşa Azərbaycanın təbii qazı ilə təmin ediləcək. Beləliklə, xarici enerji mübadiləsinə ehtiyac aradan qalxacaq.
Layihə həm regionun enerji təhlükəsizliyi baxımından mühüm əhəmiyyət kəsb edir, həm də Azərbaycanın enerji resurslarından daha səmərəli və geniş miqyasda istifadə edilməsinə şərait yaradır. 2024-cü il dekabrın 24-dən etibarən İğdır-Naxçıvan qaz kəməri qaz nəqli üçün tam hazır vəziyyətə gətirilib. Kəmər və ona bitişik stansiyada bütün texniki və normativ işlər tamamlanıb, infrastruktur tam istismara hazırdır.
Bununla yanaşı, İğdır-Naxçıvan qaz kəməri Azərbaycan ilə Türkiyə arasında strateji enerji əməkdaşlığının daha bir parlaq nümunəsidir. Layihə iki ölkə arasında enerji sahəsində etibarlı tərəfdaşlığın genişlənməsinə mühüm töhfə verir.
Bu layihənin uğurla reallaşdırılması Prezident İlham Əliyevin məqsədyönlü və uzaqgörən siyasətinin tərkib hissəsi kimi Azərbaycanın regional enerji mərkəzi kimi mövqeyini daha da gücləndirir və enerji təhlükəsizliyi strategiyasının davamlı həyata keçirilməsinə xidmət edir.
https://report.az/en/energy/igdir-nakhchivan-gas-pipeline-new-stage-in-azerbaijan-s-energy-security/