Azərbaycan ilə Dünya Bankı arasında əməkdaşlıq çərçivəsində həyata keçirilən “Bərpa Olunan Enerjinin Genişləndirilməsi” (AZURE) layihəsinin birinci mərhələsi başa çatmaq üzrədir. Bu barədə “Azərenerji” ASC məlumat yayıb.
Layihənin ilk mərhələsində “Azərenerji” tərəfindən daxili imkanlar və dövlət büdcəsinin qismən maliyyələşdirməsi ilə yeni yüksək gərginlikli yarımstansiya tikilib. Bu mərhələdə 330 kV-luq hissə ilə yanaşı, Navahidən Abşerona qədər 500 kV-luq və Banka və Biləsuvar günəş elektrik stansiyalarına qədər 330 kV-luq ötürücü xətlərin çəkilişi yekunlaşmaq üzrədir. 2024-cü ilin sentyabrında başlanan işlərin əsas hissəsi artıq tamamlanıb və layihənin birinci mərhələsi son mərhələyə daxil olub. Bununla Banka və Biləsuvar GES-lərinin enerji sisteminə qoşulması təmin ediləcək.
Layihənin ikinci mərhələsi Dünya Bankının maliyyə dəstəyi ilə həyata keçiriləcək. Bu mərhələ çərçivəsində Navahi yarımstansiyasının 500 kV-luq hissəsinin tikintisi, transformator və digər avadanlıqların alınması və quraşdırılması, həmçinin həmin yarımstansiyadan Mingəçevirə qədər 500 kV-luq, Ələt, Abşeron və Qobu istiqamətlərinə isə 330 kV-luq elektrik xətlərinin çəkilişi planlaşdırılır. Bu mərhələnin 3 il ərzində həyata keçirilməsi nəzərdə tutulur.
AZURE layihəsinin əsas məqsədi Azərbaycanda inşa edilən 2 QVt həcmində bərpa olunan enerji mənbələrinin enerji sisteminə təhlükəsiz və davamlı inteqrasiyasını təmin etməkdir. Bu məqsədlə ölkənin ən iri enerji qovşaqlarından biri olan 500/330 kV-luq Navahi Enerji Qovşağı tikilir və buradan müxtəlif istiqamətlərə yüksək gərginlikli 500 və 330 kV-luq elektrik xətləri çəkilir.
Layihənin icrası, mövcud vəziyyət və qarşıdakı vəzifələrə dair Navahi qovşaq yarımstansiyasında görüş keçirilib. Görüşdə “Azərenerji” rəhbərliyi, Dünya Bankı və “Masdar” şirkətinin nümayəndələri iştirak ediblər.
Layihənin icrası üçün Dünya Bankı tərəfindən 173,5 milyon ABŞ dolları məbləğində kredit ayrılıb. Kreditin ödəniş müddəti 15 ildir, bunun 5 ili güzəşt müddətidir və kreditin ödənişi 2039-cu ilin sonunda başa çatacaq. Azərbaycan hökumətinin layihədə iştirak payı isə əlavə dəyər vergisi və gömrük rüsumlarının ödənilməsini əhatə edən 31,2 milyon ABŞ dolları təşkil edir.
https://report.az/en/energy/azerenerji-first-phase-of-azure-project-nearing-completion/