Ukraynanın milli enerji şirkəti “Naftoqaz” Azərbaycan qazının tədarükünə başlanıldığını elan edib. Şirkətin baş direktoru Serhiy Koretsky “Report”un Şərqi Avropa Bürosuna müsahibəsində bu addımı iki ölkə arasında uzunmüddətli əməkdaşlıq üçün “strateji mərhələ” adlandırıb.
“Ukrayna Azərbaycan qazının Trans-Balkan dəhlizi vasitəsilə idxalı üzrə ilk razılaşmanı qeyd edir. Bu, münasibətlərimizdə yeni bir fəsil və uzunmüddətli əməkdaşlığın başlanğıcıdır,” – Koretsky deyib.
Onun sözlərinə görə, sınaq tədarükləri Bolqarıstan–Rumıniya–Ukrayna marşrutu ilə həyata keçiriləcək. Tədarük həcmləri açıqlanmasa da, Koretsky bu sazişi “kiçik, lakin strateji addım” adlandıraraq, onun Ukraynanın enerji təhlükəsizliyinin gücləndirilməsinə və daha geniş əməkdaşlığa yol açdığına diqqət çəkib.
“Bu əməkdaşlıq enerji mənbələrinin şaxələndirilməsinə xidmət edir və Ukraynanın davamlılığı üçün olduqca vacibdir. Azərbaycanın göstərdiyi etimada görə təşəkkür edirik,” – o bildirib.
Qeyd edək ki, 2025-ci il iyulun 28-də “Naftoqaz” qrupu Azərbaycan Dövlət Neft Şirkətinin Ukraynadakı törəmə şirkəti olan SOCAR Energy Ukraine ilə qaz alışına dair ilk müqaviləni imzalayıb. Tədarük həcmləri açıqlanmayıb.
https://report.az/en/energy/head-of-naftogaz-on-gas-deal-with-azerbaijan-new-chapter-in-relations-exclusive/