Azərbaycanın energetika naziri Pərviz Şahbazov ilə bp-nin icraçı direktoru Meq O’Nil arasında görüş baş tutub.
Görüşdə tərəflər Azərbaycanla bp arasında uzunmüddətli strateji enerji tərəfdaşlığının və enerji təhlükəsizliyi layihələri üzrə əməkdaşlığın bərpa olunan enerji və dekarbonizasiya sahələrinə doğru genişlənməsindən məmnunluq ifadə ediblər. Qeyd olunub ki, Azərbaycan‑bp tərəfdaşlığının 30 ildən çox tarixi var və bu əməkdaşlıq çətin dövrlərdə mühüm nəticələr əldə edib. Azad edilmiş ərazilərdə həyata keçirilən “Şəfəq” layihəsi, xüsusilə Cəbrayıldan yaşıl elektronların virtual ötürülməsi mexanizminin yaradılması yüksək dəyərləndirilib. Bu mexanizmin regional dekarbonizasiya və enerji ötürülməsi modellərində yeni mərhələyə doğru mühüm və innovativ bir addım olduğu vurğulanıb.
Görüş zamanı Azərbaycanın enerji sektorunda həyata keçirilən islahatlar barədə məlumat verilib. Bildirilib ki, ölkə getdikcə ənənəvi neft-qaz ixracatçısından bərpa olunan enerji istehsalçısına çevrilir və enerji strategiyası neft, qaz, hidroenerji, külək və günəş enerjisini əhatə edən balanslaşdırılmış yanaşmaya əsaslanır. Müzakirələrdə Xəzər dənizinin 157 QVt-lıq külək enerjisi potensialı, həmçinin regional enerji birləşdirici layihələri də nəzərdən keçirilib. Qeyd edilib ki, artan qlobal elektrik enerjisi tələbatı şəraitində Azərbaycan elektrik ixracını prioritet istiqamət kimi müəyyən edib. Gələcək regionlararası və beynəlxalq bağlantıların təkcə dekarbonizasiya səylərində deyil, həm də enerji təhlükəsizliyinin təmin edilməsində həlledici rol oynayacağı vurğulanıb.
Tərəflər Azərbaycanla bp arasında əməkdaşlığın daha da genişləndirilməsinə qarşılıqlı maraq ifadə ediblər. Onlar həmçinin qlobal enerji bazarlarındakı inkişaflarla bağlı fikir mübadiləsi aparıblar.
https://renewables.az/az/news/energetika-nazirliyind-bp-irk-tinin-ba-icra-direktoru-il-g-r-olub