"Şahdəniz" konsorsiumu "Şahdəniz" Kompressiya (SDC) layihəsi üzrə böyük avtomatlaşdırma müqaviləsini Emerson şirkətinə verib, "Report" BP Azərbaycana istinadən xəbər verir.
Müqavilə SDC platformasının uzaqdan idarə olunması üçün inteqrasiya olunmuş nəzarət və təhlükəsizlik sistemlərinin tədarükünü əhatə edir – prosesə nəzarət, təhlükəsizlik dayandırması, yanğın və qaz aşkarlama, həmçinin enerji idarəetmə sistemləri daxildir.
Bu sistemlər birlikdə platformanın kritik əməliyyatlarının real vaxt rejimində izlənməsinə və uzaqdan idarə olunmasına imkan verəcək, təhlükəsizliyi, etibarlılığı və əməliyyat səmərəliliyini artırmaqla yanaşı, əməliyyat xərclərini azaldacaq və uzunmüddətli performansı dəstəkləyəcək.
Bu müqavilənin imzalanması SDC layihəsinin icrasında mühüm mərhələdir. Avtomatlaşdırma və idarəetmə sistemləri pilotsuz SDC platformasının vacib tərkib hissəsi olacaq və onun bütün istismar müddəti ərzində təhlükəsiz və səmərəli fəaliyyətini təmin edəcək.
"Bu mərhələ layihənin ümumi irəliləyişinin güclü olduğu bir vaxta təsadüf edir – bu günədək təxminən 30% tamamlama səviyyəsinə çatılıb və hazırda 2700-ə yaxın işçi cəlb olunub. Mühəndislik və istehsal fəaliyyətləri bir neçə cəbhədə plana uyğun davam edir və layihəni irəli apararkən Azərbaycanın resurslarından, təcrübəsindən və sənaye imkanlarından geniş istifadə olunur", – deyə BP-nin layihə üzrə baş meneceri İlqar Məmmədov bildirib.
SDC layihəsi "Şahdəniz" yatağından neftverim əmsalını maksimuma çatdırmaqda, əlavə qaz ehtiyatlarına çıxışı təmin etməkdə və uzunmüddətli hasilatın davamlılığına kömək etməkdə əsas rol oynayacaq.
2,9 milyard dollarlıq SDC layihəsi nəhəng "Şahdəniz" qaz yatağının inkişafının növbəti mərhələsi olub, yataqda aşağı təzyiqli qaz ehtiyatlarına çıxış və onların hasilatını, həmçinin resursların maksimum çıxarılmasını təmin etmək üçün nəzərdə tutulub. Layihənin "Şahdəniz" yatağından təxminən 50 milyard kubmetr əlavə qaz və təxminən 25 milyon barel əlavə kondensat istehsalı və ixracına imkan verəcəyi gözlənilir.
Layihə yeni kompressiya qurğusunun – elektrik enerjisi ilə işləyən pilotsuz kompressiya platformasının (Normalda Xidmət Göstərilməyən Qurğu – eNUI) quraşdırılmasını nəzərdə tutur. Platforma 85 metr su dərinliyində, mövcud "Şahdəniz" Bravo (SDB) platformasından təxminən 3 kilometr aralıda quraşdırılacaq.
Dörd ədəd 11 MVt-lıq kompressora malik SDC platforması həm "Şahdəniz" Alfa (SDA), həm də SDB platformalarından qazın kompressiyası üçün əsas qurğu kimi xidmət göstərmək üçün nəzərdə tutulub – yəni platformalardan ixrac qazı Sanqaçal terminalına axıdılmazdan əvvəl SDC-də kompressiyadan keçiriləcək.
Layihə həmçinin "Şahdəniz" müqavilə zonasında dənizdə quraşdırılacaq bir sıra köməkçi obyektləri və SDA, SDB və Sanqaçal terminalında həyata keçiriləcək əlavə quruntu işlərini əhatə edir.
Tikinti işləri hazırda davam edir, tamamlanma 2029-cu ilə gözlənilir ki, SDA platformasından birinci qazın kompressiya üçün qəbuluna 2029-cu ildə, SDB platformasından isə 2030-cu ildə hazır olunsun.
https://report.az/energetika/sahdeniz-kompressiya-layihesi-ucun-avtomatlasdirma-uzre-muqavile-imlalanib