Bərpa olunan enerjidən istifadənin genişləndirilməsi, enerji səmərəliliyinin artırılması və enerji idarəetmə sistemlərinin təkmilləşdirilməsi enerji təhlükəsizliyinin gücləndirilməsinə kömək edir. Bu sözləri Azərbaycanın energetika nazirinin müavini Samir Vəliyev deyib, "Report" Energetika Nazirliyinə istinadən xəbər verir.
O, bu fikirləri Azərbaycanın 2022–2026‑cı illər Sosial‑İqtisadi İnkişaf Strategiyası çərçivəsində tədbirlərin icrasını əlaqələndirmək üçün yaradılmış "Yaşıl Enerji Məkanı" İşçi Qrupunun iclasında səsləndirib.
Vəliyevin sözlərinə görə, bu tədbirlər həmçinin enerji mənbələrinin şaxələndirilməsinə, enerji xərclərinin və itkilərinin azaldılmasına, iqtisadi rəqabət qabiliyyətinin yüksəldilməsinə kömək edir.
O qeyd edib ki, "Yaşıl Enerji Məkanı" hədəflərinin icrası təkcə enerji təhlükəsizliyinin gücləndirilməsinə deyil, həm də iqlim dəyişikliyinin təsirlərinin yumşaldılmasına və ətraf mühitin qorunmasına töhfə verir.
Vəliyevin sözlərinə görə, elektrik və qaz təchizatı sahəsində islahatlar, enerji şəbəkələrinin modernləşdirilməsi və gücləndirilməsi, müasir avadanlıqların tətbiqi, yeni yarımstansiyaların və elektrik verilişi xətlərinin tikintisi enerji təchizatının keyfiyyətini və etibarlılığını yaxşılaşdırır.
İşçi Qrupunun sədr müavini, İqtisadi İslahatların Təhlili və Kommunikasiya Mərkəzinin icraçı direktorum müavini Ramil Hüseyn 2022–2026‑cı illər Sosial‑İqtisadi İnkişaf Strategiyasının 5.2-ci hədəfi "Yaşıl Enerji Məkanı" üzrə tədbirlərin icrası barədə 2026‑cı ilin birinci yarısı üzrə monitorinq və qiymətləndirmə nəticələrini təqdim edib.
İclasda həmçinin 2026‑cı ildə tamamlanmalı olan tədbirlər üzrə icra göstəriciləri, tövsiyələr və növbəti addımlar, eləcə də yekun hesabata hazırlıq məsələləri nəzərdən keçirilib.
"Yaşıl Enerji Məkanı" İşçi Qrupuna Energetika Nazirliyinin, İqtisadi İslahatların Təhlili və Kommunikasiya Mərkəzinin, bir sıra digər nazirlik və dövlət qurumlarının, SOCAR‑ın, Mərkəzi Bankın, Azərbaycan İnvestisiya Holdinqinin, Azərbaycan Milli Elmlər Akademiyasının, Dövlət Su Ehtiyatları Agentliyinin, "Azərenerji", "Azərişıq" və "Azəristiliktəchizat"ın nümayəndələri daxildir.
https://report.az/energetika/samir-veliyev-energetika-sahesinde-islahatlar-enerji-techizatinin-keyfiyyetini-artirir