Azərbaycan Dövlət Neft Şirkəti (SOCAR) Kambocada mümkün investisiya imkanlarını araşdırmağa və yerli tərəfdaşlarla əməkdaşlıq etməyə hazırdır.
Bunu iqtisadiyyat naziri Mikayıl Cabbarov Azərbaycan-Kamboca Biznes Forumunda bildirib.
Nazirin sözlərinə görə, enerji, o cümlədən yaşıl enerji, iki ölkə arasında əməkdaşlığın perspektivli istiqamətlərindən biridir. O qeyd edib ki, Azərbaycan hazırda etibarlı qlobal enerji təchizatçısı kimi çıxış edir. Boru kəmərləri vasitəsilə Azərbaycandan təbii qaz alan ölkələrin sayı 16-ya çatır, mayeləşdirilmiş qaz alan ölkələrin sayı isə daha çoxdur.
M. Cabbarov bildirib ki, Azərbaycanın rəqabətqabiliyyətli enerji qiymətləri ölkəni istehsal fəaliyyəti üçün cəlbedici məkana çevirir. O, ənənəvi enerji, bərpa olunan enerji və enerji səmərəliliyi sahələrində əməkdaşlığın genişləndirilməsində maraqlı olduqlarını vurğulayıb.
Nazir əlavə edib ki, dövlətə məxsus SOCAR yalnız enerji təchizatçısı kimi deyil, həm də beynəlxalq səviyyədə fəal investor kimi fəaliyyət göstərir. Şirkət Avropa, ABŞ, Yaxın Şərq, Mərkəzi Asiya və digər regionlarda investisiya layihələrində iştirak edir.
M. Cabbarov Kambocadakı tərəfdaşlarla birgə işləməyə və ölkədə mümkün investisiya və əməkdaşlıq imkanlarını nəzərdən keçirməyə açıq olduqlarını bildirib.
https://report.az/energetika/mikayil-cabbarov-socar-kamboca-ile-investisiya-imkanlarini-nezerden-kecirir