Azərbaycan Antalyada keçiriləcək COP31 iqlim konfransında ikinci ikiillik şəffaflıq hesabatını beynəlxalq ictimaiyyətə təqdim etməyi planlaşdırır.
Ekologiya və Təbii Sərvətlər Nazirliyinin Aparat rəhbərinin müavini Fərman Qurbanlı bu barədə Bakıda təşkil olunan 9-cu Dayanıqlı İnkişaf Məqsədləri (DİM) Dialoqunda məlumat verib.
Onun sözlərinə görə, hesabatda ölkənin istixana qazları emissiyalarına dair ən son göstəricilər, eləcə də milli iqlim məqsədlərinin həyata keçirilməsi istiqamətində əldə olunan nəticələr əks olunacaq.
Fərman Qurbanlı vurğulayıb ki, qarşıya qoyulan iqlim hədəflərinə nail olmaq üçün genişmiqyaslı beynəlxalq maliyyə dəstəyi, müasir texnologiyalara çıxış və informasiya mübadiləsinin gücləndirilməsi mühüm əhəmiyyət daşıyır.
Bu baxımdan xarici tərəfdaşlarla əməkdaşlığın genişləndirilməsi və innovativ həllərin tətbiqi Azərbaycanın iqlim siyasətinin əsas prioritetləri sırasında yer alır. Həyata keçirilən tədbirlər ekoloji tarazlığın qorunmasına və qlobal iqlim dəyişmələri ilə mübarizəyə töhfə verməyə yönəlib.
Nazirlik rəsmisi qeyd edib ki, Azərbaycanın milli iqlim strategiyasında uzunmüddətli inkişaf məqsədləri ilə qısamüddətli fəaliyyət istiqamətlərinin uzlaşdırılmasına xüsusi diqqət yetirilir.
O bildirib ki, ali təhsil müəssisələrində həyata keçirilən təşəbbüslər istixana qazları emissiyalarının azaldılmasına və dayanıqlı inkişaf məqsədlərinin reallaşdırılmasına dəstək verir.
Bununla yanaşı, iqlim dəyişmələrinə uyğunlaşma tədbirlərinin və ekoloji dayanıqlılıq prinsiplərinin sosial-iqtisadi planlaşdırmaya inteqrasiyası mühüm istiqamətlərdən biri hesab olunur.
Fərman Qurbanlının sözlərinə görə, bu yanaşma Azərbaycanda son dövrdə təsdiqlənmiş strateji yol xəritələrində və dövlət proqramlarında da öz əksini tapıb.
https://report.az/energetika/azerbaycan-cop31-de-ikinci-seffafliq-hesabatini-teqdim-edecek