SOCAR, BP və İsrailin NewMed Energy şirkətinin daxil olduğu konsorsium Aralıq dənizində, İsrailin müstəsna iqtisadi zonasında yerləşən I-6 müqavilə sahəsində seysmik tədqiqatları başa çatdırıb.
Noyabr ayında I Zonanın müqavilə sahələrində ikiölçülü (2D) və üçölçülü (3D) seysmik tədqiqatlar yekunlaşıb. İşlər I Zonaya aid 4, 5, 6, 7, 8 və 11-ci blokları əhatə edib.
Kəşfiyyat işlərinə 2026-cı ilin oktyabr ayının əvvəlində başlanılıb. Layihənin operatoru olan SOCAR tədqiqatların aparılması üçün beynəlxalq podratçı ilə müqaviləni bu ilin iyul ayında imzalayıb.
Konsorsium iştirakçıları seysmik tədqiqatlar üçün layihənin 100 %-i üzrə ümumilikdə təxminən 25 milyon ABŞ dolları büdcə təsdiqləyiblər. Bu məbləğin təxminən 8,3 milyon dolları NewMed Energy-nin payına düşür.
Hazırda əldə olunmuş məlumatların emalı davam edir. Tədqiqatların yekun nəticələrinin 2027-ci ildə açıqlanması gözlənilir.
Xatırladaq ki, 2023-cü ilin oktyabrında SOCAR, BP və NewMed Energy konsorsiumu İsrail Energetika Nazirliyinin elan etdiyi tenderin qalibi olub. Tender Aralıq dənizində "Leviafan" qaz yatağının yaxınlığında yerləşən I-6 Zonasında geoloji kəşfiyyat işlərinin aparılması üçün lisenziyaların əldə edilməsini nəzərdə tuturdu. Müvafiq lisenziya 17 mart 2025-ci ildə verilib.
Bu layihə SOCAR və BP-nin İsrailin qaz sektoruna ilk girişidir. Konsorsiumda SOCAR layihənin operatoru olaraq 33,34 % paya, BP və NewMed Energy isə hər biri 33,33 % paya malikdir.
https://report.az/energetika/socar-ve-bp-nin-daxil-oldugu-konsorsium-israil-selfinde-seysmik-kesfiyyati-basa-catdirib